monumenta.ch > Hrabanus Maurus > csg458.15 > 39 > Psalmi, 71 > 13 > sectio 14

Wortauswahl für das Suchen

Melden Sie einen Fehler in dieser Sectio
Hrabanus Maurus, Martyrologium, 1, 14
XVIII KAL. FEBRUARII. In Campania natale Felicis presbyteri et confessoris, de quo inter alia scribit Paulinus episcopus: qui cum a persecutoribus in carcerem mitteretur, et cochleis ac testulis vinctus superpositus iaceret, per noctem ab angelo solutus atque eductus sit. Eadem die natalis est Felicis, germani ipsius, quem Dracus Urbis praefectus idolis immolare coegit, et fustibus cecidit, atque in exsilium deportare iussit, ubi et quadratos lapides caederet, sed per virtutem Dei plures ibi convertit ad fidem, hoc est, Probum tribunum et eos qui secum erant. Deinde idolum Apollinis destruxit; in quo loco fideles postea templum Deo construxerunt. Post XII vero annos ipsa die Dominica confectis mysteriis perrexit ad Dominum Iesum Christum. In Spoletana civitate natale Pontiani martyris, qui passus est temporibus Antonini imperatoris, sub Fabiano iudice; qui cum nollet idolis sacrificare, iussit eum virgis caedi crudelissime; deinde nudis pedibus super carbones ardentes ambulare, postea duo leones immissi sunt ut eum devorarent, sed in nullo laesus est ab eis: hoc videns iudex iussit liquefieri plumbum, et perfundi in dorsum eius, sed cum hoc nihil eum laesisset, capite truncatus est.